Brgy 38 nangusog mapatuman proyekto maghatag dugang kaarangan sa kabatan-onan

GIHINGUSGAN sa Barangay 38 nga mapatuman ang mga programa nga maghatag og dugang kaarangan sa kinabuhi sa kabatan-onan sa ilang dapit.

Kini human ang konseho sa syudad ubos ni Bise Mayor Bebot Rodriguez misagop sa resolusyon nga nag-uli sa ordinansa sa Barangay 38 diin nasukip ang ilang 2025 Annual budget nga adunay gibanabanang kinitaan ug galastohan balor P3,674,739.00.

Gihatagan og prayoridad sa barangay ang programa sa pagpalambo sa kabatan-onan aron maaghat sila sa pakiglambigit sa mga kalihokan ug makapadasig kanila diha sa pagkab-ot sa dugang kaarangan ug kalamboan sa ilang kinabuhi.

Lakip sa gipundohan nga mapatuman karong tuiga ang mga proyekto ug programang gipundohan ubos sa 20% Development Fund nga naglakip sa pagrehabilitar sa mga kanal ug material recovery facility.

Gipundohan usab sa barangay ang pagtunol og benepisyo sa mga kawani niini, maintenance expenses lakip na sa training, gamit sa opisina, programa sa nutrisyon ug uban pang operating expenses, igong pundo alang sa pagpatuman sa mga lakang pagtubag sa panginahanglan sa katawhan panahon sa kalamidad, ug uban pang mga programa nga gilantawng maghatag og dugang kalamboan sa kinabuhi sa katawhan sa barangay.

Si Konsehal Marlo Tabac, chairman sa komite sa barangay affairs, kinsa usa sa nagpaluyo sa gisagop nga resolusyon mipadayag sa iyang suporta sa maong lakang human nakita nga nahisubay kini sa balaod ug dako ang ikatabang alang sa kaarangan sa maong barangay.

Ang resolusyon nga gipalabang sa konseho alang sa maong katuyoan gipaluyohan usab sa komite sa pamalaod ni Konsehal Edgar Cabanlas. (RNQ/SP)