top of page

Bong Go gisagop nga anak sa CDO


Usa na ka Kagay-anon si Senador Christopher Lawrence “Bong” T. Go.

Kini human ang konseho sa syudad ubos ni Bise Mayor Bebot Rodriguez mideklara sa senador nga sinagop nga anak sa dakbayan sa Cagayan de Oro ug naghatag kaniya sa tanang katungod ug pribilihiyo sa usa ka Kagay-anon.

Ang maong lakang nahimo human si Konsehal Girlie Balaba mipasabot, atol sa sesyon sa konseho niadtong Lunes, nga angayang pasalamatan si Senador Bong Go pinaagi sa pagsagop kaniya nga usa ka anak sa Cagayan de Oro tungod sa iyang naamot nga kalamboan sa kinabuhi sa mga Kagay-anon.

Matod sa konsehal nga duha ka Malasakit Center ang napahimutang sa senador dinhi sa syudad, usa sa NMMC ug usa sa JR Borja General Hospital ug migahin usab og pundo alang sa pagtukod sa duha ka super health centers dinha sa barangay Balubal ug San Simon.

Dugang pa, upat ka health centers ang gipaabot nga matukod karong karong tuiga nga gipundohan usab sa senador.

Sa iyang bahin, si Bise Mayor Rodriguez miingon nga dako usab iyang pasalamat kang Senador Bong Go sa gitunol nga ayuda sa mga biktima sa sunog sa iyang barangay.

Matod niya nga ang senador lang ang nakapadala sa maong ayuda nga labing gikinahanglan sa mga pamilyang biktima sa maong katalagman.

Usa ka resolosyon ang gipasaka sa konseho alang sa maong katuyuan.

Comentarios


bottom of page