Bebot misuporta sa awhag ma-instalar road studs, solar lights sa kadalanan

HUGOT nga gisuportahan ni Bise Mayor Bebot Rodriguez ang panawagan nga ma-instalar dinha sa kadalanan ang mga road studs o’ cat’s eye ingon man ang paghulip sa mga led streetlights ngadto sa solar lights.

Kini ang pamahayag sa bise mayor human si Konsehal Edgar Cabanlas sa sesyon niadtong Lunes mitaho sa kakulangon sa roads studs dinha sa pipila ka highway sa syudad.

Matod ni Rodriguez nga iyang nasinati ang dakong tabang sa mga road studs aron luwas ug adunay kapaseguroan ang ilang pagbyahe paingon sa kaulohan agi sa Tacloban ug sa pagbalik dinhi sa syudad agi sa Batangas, Cebu ug Dumaguete.

Bisan sa Mindoro, usa ka gamay nga lugar, apan adunay road studs sa ilang mga dalan. Sukwahi sa Cagayan de Oro, usa ka progresibong lugar apan walay mga road studs ang kadalanan, pamahayag sa bise mayor.

Dugang niini, gisuportahan usab sa bise mayor ang pagpuli og solar lights sa mga led streetlights. Dako ang atong madaginot sa balayronon sa kuryente kun atong mailisan ang mga led lights sa kadalanan ngadto sa solar lights, pasabot ni Bise Mayor Bebot Rodriguez.