Barangay Indahag Revenue Code konsiderahon sa Komite ni Lim

KONSIDERAHON sa Komite sa Barangay Affairs ubos ni Konsehal Yan Lam Lim ang gidusong ordinansa  sa Barangay Indahag ning syudad.

Kini nag-amendar  sa ilang Ordinance No, 001-2024 kon Barangay Indahag Revenue Code nga naghan-ay sa updated rates, fees ug charges sa mga clearances, certifiko, rental ug ubang serbisyo nga gitanyag sa barangay.

Sa maong amendatory ordinance, gipasabot sa barangay nga kini gihimo subay sa Section 16 sa Akta Republika 7160 nga nagmando sa mga local government units pagpromote sa kinatibuk-ang kaayohan sa ilang katawhan ug pagpalambo sa kauswagan sa ilang ekonomiya nga diin kini pagatawgon nga “Barangay Indahag Revenue Code of 2025”.

Lakip sa balayrunon nga gibag-o ubos sa maong balaod ang barangay clearance fee, barangay certificate, special certificate, rates, rental fees, license permit ug uban pa.

Ang komite  gipaabot  mopatawag og tigom alang sa pagtuki sa maong ordinansa ug modapit sa mga hintungdang departamento sa kagamhanan alang sa pagpaminaw sa ilang opinyon kalabot sa maong Barangay Revenue Code. (JRGalano/SP)