Barangay Bugo Employment Week gisuportahan sa Konseho

HAYAN mahatagan og dugang kaarangan ang katawhan sa Barangay Bugo.

Kini human ang Konseho sa Syudad atol sa sesyon sa Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa nga nagdeklarar sa matag ikatulo (ika-3) nga semana sa Oktubre  isip Barangay Employment Week sa Barangay Bugo ug pag-establisar og mga giya ug mga programa alang sa lokal nga promosyon sa trabaho.

Buot sa barangay nga pinaagi sa maong selebrasyon mapasiugda ang inklusibo nga mga oportunidad sa panarbaho ug magpunting sa paghimo og plataporma alang sa mga nangita og trabaho pinaagi sa pagpahigayon sa mga job fair, skill matching programs ug paghatag og orientation sa pagpanarbaho alang sa mga residente niini.

Gawas sa job fair, ipahigayon usab ang skills training and livelihood program, career counseling, resume writing, entrepreneurship seminar ug uban pa.Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni Konsehal Yan Lam Lim ug sa komite sa pamalaod ug reglamento ni Konsehal Edgar Cabanlas. (RNQuiblat/SP)