Balor P6.78M nga budget sa Brgy 22 mapatuman na

PABORABLENG giuyunan sa Konseho sa Syudad sa sesyon niadtong Lunes nga gidumala ni Bise Mayor Kikang Uy ang resolusyon nga nag-uli sa ordinansa sa Barangay No. 22 diin nasukip ang ilang 2022 Annual Budget.

Kini adunay gibanabanang kinitaan ug galastohon balor P6,785,553.00 nga gamiton sa pagpatuman sa ilang mga programa ug proyekto karong tuiga.

Lakip sa gigahinan sa barangay sa maong budget ang proyekto pag-instalar og dugang mga suga sa kadalanan, paghinlo sa drainage, pagrehabilitar sa materials recovery facility, pagtul-id sa multi-purpose hall, pagrehabilitar sa drainage line canal road ug uban pang mga programa ug proyekto nga gilantawng maghatag og dugang kaarangan sa kinabuhi sa katawhan.

Si Konsehal Alam Lim, chairman sa komite sa barangay affairs ug usa sa nagpaluyo sa gipasakang resolosyon, mibutyag nga iyang gisuportahan ang maong lakang tungod kay dako kini og ikatabang sa katawhan sa barangay.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Lim ug komite sa pamalaod ug reglamento ni Konsehal Ian Mark Nacaya.