Balor P5M annual budget sa Brgy 32 mapatuman na

Mahimo nang ipatuman sa konseho sa Barangay No. 32 ang ilang mga progama ug proyekto nga gipunduhan karong tuiga. Kini human ang Konseho sa syudad sa sesyon kagahapon nga gidumala ni Bise Mayor Jocelyn Rodgriguez misagop sa resolusyon nga nag-uli sa ordinansa sa barangay diin nasukip ang ilang annual budget nga adunay gibanabanang kinitaan ug galastohon balor P5,002,523.

Tipik sa gigahinan sa maong budget ang 5 porsyentong calamity fund balor P250,125.00 nga gilarawng gamiton pagpalit sa mga calamity related supplies ug ekipo nga magamit panahon sa kalamidad. Kapin usab sa P500 mil ang gigahin sa barangay alang sa mga programa ug proyekto sa kabatan-onan ug balor P463,162.00 alang sa 20 porsyentong Development Fund nga gamiton pagpatuman sa mga proyekto sa imprastraktura.

Lakip sa maong mga proyekto ang pagrehabilitar sa ilang Material Recovery Facility, pagtul-id sa drainage, pag-instalar og suga sa kadalanan, paghinlo sa mga kanal ug uban pang mga proyekto nga gilantawng maghatag og kalamboan sa ilang dapit.

Ang resolusyon nga gipalabang sa Konseho alang sa maong katuyuan gipaluyuhan sa komite sa barangay affairs nga gidumala ni Konsehal John Michael Seno ug komite sa pamalaod ni Konsehal Ian Mark Nacaya.