Balor P5.51M programa, proyekto sa kabatan-onan sa 2022 gisugyot

HAYAN mahatagan sa dugang kalamboan ang sektor sa kabatan-onan sa dakbayan sa Cagayan de Oro.

Kini human nadawat sa konseho sa syudad ubos ni Bise Mayor Kikang Uy ang gisumite nga Executive Budget ni Mayor Oscar Moreno alang sa umaabot tuig 2022.

Sa maong executive budget, kapin sa P5.51 milyones ang gisugyot nga gahin alang sa pagpatuman sa mga proyekto ug programa sa buhatan sa Oro Youth Development Office.

Kini naglangkob sa Leadership and Skills program balor P1 milyon, Youth-led Social Audit program balor P1.08 milyones ug alang sa Out of School Youth program adunay gisugyot nga gahin balor P606,828.

Lakip sa gisugyot mapundohan mao ang SK Empowerment program (P550,000) ug Adolescent & Youth Health & Development program (P300,000).

Niini, si Konsehal John Michael Seno, chairman sa komite sa Sports and Youth Development, hugot nga misuporta sa maong mga programa ug mipasalamat sa kagamhanan nga taliwala sa nasinating pandemya dala sa CoVid-19 padayon ang paglantaw sa tinguha nga mahatagan sa dugang kalamboan ang mga kabatan-onan.

Pinaagi sa pagpatuman sa maong mga programa malaumon si Seno nga daghan pang kabatan-onan ang maaghat nga makiglambigit sa mga kalihokan nga giandam alang kanila.