Balor P28M nga 2022 budget sa Puntod tun-an sa Brgy Affairs

GIPAABOT hatagan og pagtagad sa komite sa Barangay Affairs ni Konsehal Yan Lam Lim ang ordinansa nga gisumete sa Barangay Puntod diin nasukip ang ilang 2022 Annual Budget nga adunay gibanabanang gahin ug galastohon balor P28,868,529.00.

Sa ordinansa nga nadawat sa Konseho sa syudad ubos ni Bise Mayor Kikang Uy, nasayran nga lakip sa ilang gihatagan og prioridad mao ang pag-instalar og mga suga sa kadalanan, pagtukod og Mini Public Market, pagrehabilitar sa covered court, pagtukod og pathways ug paghinlo sa mga kanal.

Dugang niini, migahin usab ang barangay og igong kantidad aron magamit pagtul-id sa ilang health center, barangay hall ug day care center ingon man pagpalit og furnitures ugfixtures, pag-fabricate sa ilang dugang Material Recovery Facility alang sa ilang Barangay Ecological Solid Waste Management Program ug pagpatuman sa uban pang mga programa ug proyekto nga magpalambo sa serbisyo ngadto sa ilang mga molopyo.