Balor P2.90M nga mga proyekto, programa sa Bayabas mapatuman

GIUYUNAN na sa Konseho sa syudad sa sesyon niadtong Lunes nga gidumala ni Bise Mayor Kikang Uy ang ordinansa sa Barangay Bayabas diin nasukip ang ilang Supplemental Budget No. 1 nga adunay gibanabanang kinitaan ug galastohon balor P2.90 milyones.

Nasukip sa maong budget ang pagsemento sa dalan diha sa Zone 5, pagpalit og usa ka sakyanan nga magamit sa operasyon sa barangay ug pagpatuman sa uban pang mga programa ug proyekto nga gilantawng maghatag og kaarangan ug kalamboan sa ilang dapit.

Si Konsehal Yan Lam S. Lim, chairman sa komite sa Barangay Affairs, misuporta sa maong lakang tungod kay dako kini og ikatabang sa barangay diha sa pagtunol sa mga batakang serbisyo ngadto sa ilang ginsakopan.

Ang resolusyon nga gisagop sa konseho alang sa maong katuyuan gipaluyuhan sa komite sa Barangay Affairs ni Konsehal Lim ug komite sa Pamalaod ni Konsehal Ian Mark Nacaya.