Balor P15M budget sa Bayabas giuyonan sa Konseho

Hingpit nang mapatuman sa Barangay Bayabas ang ilang mga programa ug proyekto karong tuig 2023.

Kini human ang Konseho sa syudad sa sesyon kagahapon nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2023 Annual Budget nga adunay gibanabanang kinitaan ug galastohon balor P15,905,446.00.

Tipik sa gigahinan sa maong budget ang pagtul-id sa mga suga sa kadalanan, dunggo-anan sa mga sakayan, Foot Bridge sa Zone 1, 6, 8 ug Keven Drive; pagrehabilitar sa Day Care Centers sa Zone 1, 5, 7 ug 8; pagtukod sa Material Recovery Facility sa Zone 2, 3 ug 8; pagtul-id sa koral sa Bayabas National High School, ug pagpalambo sa Lupon building, health center ug covered court.

Dugang niini, gigahinan usab sa barangay og igong pundo ang pagtukod og drainage diha sa Zones 1, 2 ug 5; pagtukod og Mini-MRF sa Zone 2, 4 ug 8; pagtukod og Senior Citizens multi-purpose building sa Zone 1 ug 8; pag-instalar og suga sa Rotonda, paghinlo sa kanal sa Zone 1, 2, 3, 4 ug 6; ug uban pang mga proyekto nga gilantawng maghatag og dugang kalamboan sa kinabuhi sa katawhan sa barangay.

Ang resolusyon nga gisagop sa Konseho alang sa maong katuyuan gipaluyuhan sa Komite sa Barangay Affairs ni Konsehal Yan Lam S. Lim ug Komite sa Pamalaod ni Konsehal Edgar Cabanlas.