Backyard community gardening sa Brgy.14 maimplementar na

MAIMPLEMENTAR  na sa Barangay 14 ning syudad ang backyard organic / community gardening  sa ilang dapit.

Kini human ang  konseho sa sesyon kagahapon nga gidumala ni Presiding Officer Pro Tempore Councilor Romeo V. Calizo, hiniusang  misagop  sa  resolusyon  nga nag-uli sa ordinansa barangay nga gitawag og Backyard/ Community Organic Gardening Ordinance.

Kini subay sa  DILG MC 2023-001 nga nagmando sa  tanang barangay alang pag-implementar sa Barangay Community Garden.

Sa maong ordinansa, gipadayag  sa barangay nga ilang kaikag  nga i-promote ang  organic gardening sa ilang barangay  pinaagi sa paggamit sa bag-ong teknolohiya inubanan sa paghatag sa libre nga  fertilizers ug biopesticides.

Sumala  pa,  ang barangay mugahin usab  og igong pundo  alang sa maong katuyoan  alang sa hingpit nga kalamposan sa maong programa.

Ang resolusyon nga gipalabang sa konseho alang sa maong katuyoan gipaluyohan sa Komite sa Barangay Affairs ubos ni Konsehal Yan Lam Lim ug Komite sa Pamalaod ug Reglamento ni Konsehal Edgar Cabanlas.