Asa na ang One Covid allowance, pangutana ni Konsehal Esparcia

Hugot nga gisugyot ni Konsehal Bernie Esparcia nga matabangan nga mapadali ang paghatag sa One Covid Allowance sa mga Health Workers sa syudad labina diha sa JR Borja Hospital.

Kini ang unod sa special report sa konsehal sa session niadtong Lunes nga gidumala ni Bise Mayor Jocelyn Rodriguez.

Matod ni Esparcia nga halos kada adlaw makadawat siya og mga mulo sa iyang messenger ug Email gikan sa mga health workers nga gapangutana kon asa na ug kon unsa nay update sa maong allowance kay hangtod karon, wala pa gayud nila kini madawat.

Gipasabot ni Esparcia nga gani ang mga nurses sa ubang dapit nagpasalamat naman tungod kay nakadawat naman sila sa maong allowance.

Unsaon nato pagserve sa katawhan kon mismo ang atong taga gobyerno medyo galisod, hinaot matabangan sila, pamahayag ni Konsehal Esparcia.

Niini, gihangyo ni Konsehal Esparcia ang komite sa panglawas ni Konsehal Malou Gaane sa pagpatawag og tigom alang sa maong katoyuan aron nga mahibaw-an asa man gyud ang problema niini ug nganong nalangan kini, aron sa ingon mapangitaan og solosyon.