Aplikasyon sa hackfight, derby gipatun-an sa City Legal

GIKINAHANGLAN sa komitiba sa games and amusement ni Konsehal Roger Abaday ang opinyon sa buhatan sa City Legal ayha kini maghatag panugot sa RBR Promotion sa pagpahigayon og hackfight ug derby diha sa Barangay Indahag.

Gipasabot ni Abaday nga suportado niya ang maong padula kay kini magdalag kabibo ug makapadugang sa kinitaan sa barangay, apan iyang gitin-aw nga gikinahanglan kini mosubay sa tukmang proseso segun sa gisitar sa balaod.

Ubos sa Presidential Decree 449, kun Cockfighting Law of 1974, ug sa lokal nga ordinansa sa syudad, ang maong matang sa sabong mapahigayon lamang panahon sa kapistahan ug uban pang opisyal nga kalihokan sa barangay, dugtong sa konsehal.

Sa iyang bahin, si Kagawad Nazar P. Uayan sa Indahag, mibutyag nga adunay ordinansa ang ilang barangay nga nagdili sa pagpahigayon sa maong matang sa aktibidad sa bisperas o’ mismong petsa sa kapistahan.

Ug gituman kini ni Ricardo Dumandan, aplikante ug manager sa RBR promotion, tungod kay iyang gi-iskedyul ang maong pasabong sa adlaw sa semana, Abril 28 (Martes) ug Abril 30 (Huwebes), ning tuig, dugang ni Uayan.

Apan mipahinumdum si Richmond de Guzman, representante sa City Legal Office (CLO), nga matag Domingo lamang ug espesyal nga okasyon ang gitugot sa balaod.

Si Konsehal Aga Suan, kinsa mitambong sa maong tigom ug gikuhaan sa iyang opinyon, miuyon nga kinahanglang sundon ang giya sa CLO usa kini maaprobahan sa konseho.

Nunot niini, giduso ni Konsehal Abaday ang maong sugyot hangyo ngadto CLO alang sa dugang pagtuon ug rekomendasyon. (FDC/SP)