Anti-vandalism ordinance sa Cugman gisuportahan sa konseho

MAPATUMAN na sa Barangay Cugman ang ilang anti-vandalism ordinance.

Kini human ang konseho sa syudad atol sa sesyon niadtong Lunes nga gidumala ni Presiding Officer Pro Tempore Konsehal Romeo Calizo misagop sa resolusyon nga nag-uli sa ilang ordinansa nga nagpahamtang sa multa niadtong masapon nga maghimo sa vandalismo sa mga pang-publiko ug pribadong buhatan.

Ang multa mao ang P500 ug community service sulod sa upat ka oras sa unang pagsupak; P800 ug community service sulod sa walo ka oras sa ikaduhang higayon samtang P1,000 ug community service sulod sa disesais ka oras (16hrs) sa ikatulo ug mosunod pang paglapas.

Hugot nga katuyuan sa Konseho Barangay Cugman nga magpabilin ang kalimpyo sa ilang palibot.

Ang ordinansa sa Barangay Cugman miagi sa makuting pagtuon ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni Konsehal Yan Lam Lim ug sa komite sa pamalaod ni Konsehal Edgar Cabanlas. (MLRapanot/SP)