top of page

Anti-Discrimination Law sa Cugman tun-an sa barangay affairs

TUN-AN sa komite sa barangay affairs ni Konsehal Alam Lim ang gipalabang nga Anti-Discrimination Ordinance (ADO) sa konseho sa barangay Cugman.

Kini naghan-ay sa mga gabayan sa tinguha nga walay mapihig nga molopyo sa barangay basi sa sexual orientation ug maghatag sa patas nga kahigayonan alang sa tanan ilabina ang mga sakop sa LGBTIQ community.

Lakip sa gitumbok nga matang sa diskriminasyon mao ang paghikaw sa kahigayonan nga makatungha, ma-promote, makasalmot og training ug uban pang benepisyo nga gitanyag ngadto sa mga empleyado ug pagdili nga makasulod sa mga pampublikong programa o’ serbisyo sama sa medical ug uban pang health services sa rason nga lahi ang gender orientation.

Gidili usab sa ordinansa ang mga lakang nga magpakgang sa pagpasulod sa usa ka molopyo o’ grupo sa mga tawo dinha sa mga establisamento sama sa mga kan-anan, bars, tindahan, sinehan, shopping malls ug susamang mga lugar nga abli alang sa publiko.

Ang maong ordinansa sa Cugman nagpahamtang og multa ug silot nga P500 ug walo ka oras nga community service alang sa unang kalapasan, P700 ug 16 ka oras nga community service sa ikaduhang kalapasan ug P1 ka libo ug 24 oras nga community service alang sa ikatulong kalapasan. (SP/JNortiza)


bottom of page