Anti-child labor ordinance sa 2 ka barangay giaprobahan sa Konseho

GILANTAW mapalapdan pa ang pagpatuman sa balaod sa Siyudad bahin sa paghatag og proteksyon sa mga bata gikan sa tanang matang sa pag-abuso ug diskriminasyon.

Kini human ang Konseho sa sesyon niadtong Lunes nga gidumala ni Presiding Officer Pro Tempore Konsehal Romeo Calizo misagop   og managlahing resolusyon nga nag-uli sa anti-child labor ordinance sa Barangay Macabalan ug Tablon, ning syudad.

Ang maong ordinansa nagtumong pagwagtang sa tanang  matang sa child labor ug paghatag og mas lig-on nga proteksyon sa nagtrabaho nga mga bata batok sa pag-abuso, pagpahimulos ug diskriminasyon.

Gihimo kini sa barangay human sa pagrekognisar sa ilang Barangay Council for the Protection of Children (BCPC) nga adunay pipila nga mga trabahador nga bata sa ilang barangay ug aron mahatag kanila og balik ang ilang mga katungod sa pagpuyo nga disente, paghatag og maayong edukasyon, panglawas ug hingpit nga makaangkon og sarang nga kalamboan.

Alayon sa maong ordinansa, ang Konseho sa Barangay Macabalan ug Tablon maghatag multa ug silot ngadto ni bisan kinsa nga employer nga makalapas sa nakalatid sa maong ordinansa. 

Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni Konsehal Yan Lam Lim ug sa komite sa pamalaod ug reglamento ni Konsehal Edgar Cabanlas.