Annual Budget sa Brgy 31 giuyunan sa konseho

Hingpit nang mapatuman sa konseho sa Barangay No. 31 ang ilang mga programa ug proyekto karong tuig 2022.

Kini human ang konseho sa syudad sa sesyon niadtong Lunes nga gidumala ni Bise Mayor Jocelyn Rodriguez misagop sa resolusyon nga nag-uli sa ordinansa sa barangay diin nasukip ang ilang Annual Budget nga adunay gibanabanang kinitaan ug galastohon balor P8,210,331.00.

Niini, gigahinan sa barangay gikan sa maong annual budget ang pag-instalar og dugang suga sa kadalanan, paghinlo sa mga kanal, pagrehabilitar ug pag-improbar sa health center, pagpalit og supplies ug ekipo nga magamit panahon sa kalamidad ug daghan pang uban nga gilantawng makatabang sa katawhan sa dapit.

Ang resolusyon nga gisagop sa konseho alang sa maong katuyuan gipaluyuhan sa komite sa barangay affairs ni Konsehal Yan Lam Lim ug komite sa pamalaod ni Konsehal Ian Mark Nacaya.