top of page

Annual budget sa Brgy 14 SK giuyonan

MAPATUMAN na sa hingpit sa mga opisyal sa Sangguniang Kabataan (SK) sa Barangay 14 ang ilang mga programa ug proyekto nga gipundohan karong tuiga ug gilantaw’ng maghatag sa dugang kaarangan sa kinabuhi sa kabatan-onan sa dapit.


Kini human ang konseho sa syudad sa sesyon kagahapon nga gidumala ni Bise Mayor Bebot Rodriguez misagop sa resolosyon nga nag-uli sa resolosyon sa SK diin nasukip ang ilang 2023 annual budget.


Kini adunay gibanabanang kinitaan ug galastohon balor P375,763.70 nga gamiton sa pagpatuman sa ilang mga programa ug proyekto nga gihatagan sa prayoridad subay sa probisyon sa RA 10742 kon Sangguniang Kabataan Reform Act of 2015.

Tipik sa gihatagan sa prayoridad ang programa sa edukasyon ilabina ang pagpakatap sa dugang kahibalo sa natad sa panglawas, pagproteher sa kinaiyahan, pagpalambo sa paugnat sa kusog ug uban pang mga programa nga makahatag og kadasig nga makiglambigit ang mga kabatan-onan sa barangay.


Si Konsehal John Michael Seno, chairman sa komite sa Sports and Youth Development, kinsa usa sa nagpaluyo sa gisagop nga resolosyon mipadayag sa iyang suporta sa maong lakang human nakita nga makatabang sa kaarangan ug kalamboan sa kinabuhi ang nahan-ay nga mga programa. Ang resolosyon nga giasagop sa konseho gipaluyohan usab sa komite sa pamalaod ni Konsehal Ian Mark Nacaya.


Komentar


bottom of page