Annual budget sa Barangay 9 giuyonan sa konseho

HINGPIT nang maimplementar sa Barangay 9 ning dakbayan ang  ilang mga programa ug proyekto karong tuig 2025.

Kini human ang konseho sa sesyon niadtong Lunes nga gidumala ni Presiding Officer Protempore Konsehal Roger Abaday hiniusang misagop og resolusyon nga nag-uli sa Resolution No. 103-2025 nga may kalabotan sa 2025 Annual Budget  sa maong barangay nga mokabat sa P4,209,295.

Tipik sa gihatagan og prioridad sa maong budget ang pagpalit sa mga fire equipments, hand held radios, pagpahigayon  og training ingon man seminars ug igong pundo alang sa mga programa sa kabatan-onan sa ilang dapit.

Migahin usab ang barangay og igong pundo alang sa 5-porsyentong Calamity Fund nga diin diha kuhaon ang pagpalit sa mga calamity-related supplies ug uban pang gikinahanglan panahon sa katalagman.

Ang resolusyon nga gisagop sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug komite sa pamalaod ug reglamento ubos ni Konsehal Ed Cabanlas. (JRG/SP)