Annual budget sa Barangay 17 giuyonan sa konseho

MAHIMO nang ipatuman  sa konseho sa Barangay 17 ang mga programa ug proyekto nga gipundohan sa ilang 2025 Annual Budget.

Kini human giuyonan sa konseho sa dakbayan sa sesyon niadtong Lunes nga gidumala Bise Mayor Bebot ang Resolution No. 020-2025 sa barangay nga may kalabotan sa ilang budget nga adunay gibanabanang kinitaan ug galastohon nga mokabat sa P5,501,785.

Tipik sa gihatagan sa prioridad sa maong budget ang paghinlo sa mga canal aron malikayan ang pagbaha, pag-instalar og dugang suga sa kadalanan ug paghatag sa programa sa panginabuhian sa ilang katawhan.

Migahin usab ang barangay og igong pundo alang sa ipahigayong trainings alang sa pagpangandam sa kalamidad ug pagpalit sa gikinahanglang calamity-related supplies ug igong pundo alang sa mga programa sa Sangguniang Kabataan sa ilang dapit.

Ang resolusyon nga gisagop sa konseho alang sa maong katuyoan gipaluyohan sa komite sa barangay affairs ni Marlo Tabac ug komite sa pamalaod ug reglamento ubos ni Konsehal Ed Cabanlas. (JRG/SP)