Amnestiya sa accumulated liability sana-impound nga mga sakyanan gisugyot

HISGUTAN sa tigom karong alas 9 sa buntag sa komite sa roads and traffic management ni konsehal Romeo Calizo ang sugyot paghatag og amnestiya sa accumulated liability sa storage fee sa mga nanag-iya og sakyanan nga na-impound dinha sa Roads and Traffic Adminsitration (RTA).

Kini human si RTA chief Rizalino Borlagdatan miduso sa sugyot agig kabahin sa pagpatuman sa Ordinance No. 10551-2007 kon Traffic Code of Cagayan de Oro City ug paghatag og higayon sa mga nanag-iya sa sakyanan nga malukat kini.


Sa maong sugyot, adunay ipahamtang nga one time charge balor P3 mil ngadto sa mga nanag-iya sa sakyanan nga wala malukat sulod sa dugayng panahon gikan sa tuig 2020 paubos.

Subay sa ordinansa, adunay gipahamtang nga tag-P100 matag adlaw nga storage fee alang sa light vehicles ug P300 matag adlaw sa mga heavy equipment.


Matod pa nga ubay ubay sa mga sakyanan ang wala malukat sulod sa dugayng panahon ug ang maong lakang mag-engganyo sa mga nanag-iya nga lukaton ang ilang mga sakyanan samtang dili pa magpahigayon og public auction sale ang dakbayan.


Gisugyot nga ang maong amnestiya ipatuman sulod sa 180 ka adlaw gikan sa pag-aprobar niini sa konseho. (SP)