Agri-tourism ordinance sa Bugo tukion sa komite sa barangay affairs

GIDAYEG ni Konsehal Jay Pascual, chairman sa komite sa agriculture, ang Konseho sa Barangay Bugo sa pag-ila sa ilang barangay nga adunay daghang kahinguhaan sa agrikultura ug usa ka malamboong komunidad sa panguma.

Kini human mipalabang ang maong barangay sa ordinansa tumong sa pagpalambo sa agri-tourism sa ilang barangay.

Gitinguha sa barangay ang pagpalambo sa agri-tourism farm ug mga destinasyon isip usa ka malungtarong pamaagi sa pagpanguma, pagpalig-on sa kalidad sa barangay ug pagpauswag sa lokal nga trabaho ug oportunidad sa panginabuhian sa mga lumulupyo niini.

Niini, kusganong gidayeg ni Pascual ang maong barangay kay usa kini ka paagi nga mahimong malungtaron nga destinasyon ang Bugo sa natad sa agri-tourism ug naglaum nga mahatagan kini sa tukmang rekomendasyon sa komite sa barangay affairs ni Konsehal Yan Lam Lim. (RNQuiblat/SP/Photo from Rappler)