Abbu nahingawa sa pag-usbaw sa mining fees

GIKAHINGAWA ni Konsehal Jose Pepe Abbu Jr., chairman sa komite sa labor and employment sa konseho, nga pagpatuman og increase   sa environmental related fees sa mining activities bisan og walay nahitabong pag-amendar 2015 Revenue Code sa syudad.

Kini human ang representante sa buhatan sa CLENRO atol sa tigom sa komite sa ways and means kagahapon nga gidumala ni Konsehal Goking miangkon   nga aduna silay gipatuman nga adjustment sa  balayrnon sa mining activities.

Nasayran nga  niadtong tuig 2020 adunay proposal sa pag-amendar  sa Revenue Code apan wala pa kini maaprobahi, butang nga gikadismaya ni  Konsehal Abbu kay nagbuot-buot  ang buhatan sa pag-imposar og increase.

Gani  gipangutana  ni Konsehal Abbu kon unsay ilang basihan sa ilang gahom  sa pagkolekta sa maong balayrunon nga wala man kini nahiuyon  sa kasamtangang ordinansa.

Subay niini,  gihangyo ni Abbu ang  buhatan  sa paghatag og kopya sa ilang   assessment  sa  mga balayrunon nga  nadawat sa ilang buhatan  aron iyang makompara sa Revenue Code of 2015. (JRGalano/SP)