top of page

Abaday, Pascual padayong motuon sa lakang madeklara Oro River isip Flood Rescue Training Hub

PADAYONG tun-an sa Komite sa Environment ni Konsehal Roger Abaday ug Komite sa Turismo ni Konsehal Jay Pascual ang hangyo sa Cagayan de Oro River Rafters nga madeklara ang Cagayan de Oro River isip Central River Rafting and Swift Water and Flood Rescue Training Hub. Kini human pakyas sa pagtambong ang presidente sa kapunungan sa mga water rafters sa milabayng tigom sa duha ka komite.


Si Konsehal Jay Pascual, atol sa tigom, hugot nga miingon nga gikinahanglan ang tukmang rekomendasyon aron makab-ot ang solusyon nga walay mabitahaan tali sa mga rafters ug quarry permittees.

Matod niya nga ang white water river rafting, gawas nga usa sa mga nag-unang atraksyon sa syudad, nakahatag usab og kapanginabuhian sa mga molopyo sa bukid nga bahin samtang ang operasyon sa quarry diha sa mga gitugot nga mga dapit dako usab og tabang sa ekonomiya sa syudad.


Niini, sa tinguha nga makab-ot ang gikinahanglang rekomendasyon, gidapit nga motambong sa sunod tigom sa duha ka komite ang pipila ka mga barangay kapitan nga maapektohan sa mga kalihokan sa quarry ug river rafting, mga quarry permittees ug mga sakop sa Cagayan de Oro River Rafters. Ang milabayng tigom sa duha ka komite gitambongan usab ni Konsehal Aga Suan.

留言


bottom of page