Abaday pabor nga ma-imbestigahan ang giingong pagpangokolekta, pag-isyu sa ticket dihas Pueblo de Oro

SUPORTADO ni Konsehal Roger Abaday, chairman sa komite games and amusement, nga ma-imbestigahan ang gikatahong pagpangolekta ug pag-isyu sa ticket sa mga security enforcers diha sa Pueblo de oro aron masuta usab ang legalidad niini.

Kini ang gipaambit ni Konsehal Abaday agig reaksyon sa special report ni Konsehal Jonjon Rodriguez kalabot sa nahitabo sa usa ka PWD diha sa maong dapit diin gi-clamp ang sakyanan niini, gi-insulto ug gipabayad sa P500 sa pueblo enforcer nga walay gihatag nga resibo.

Sumala ni Abaday nga gusto niyang masuta ang legalidad sa maong matang sa ilang operasyon kay matod pa kon dili mabayaran ang multa sulod sa 72 oras, mopasaka sila ug kaso.

Lakip usab nga gustong ipasusi sa konsehal kon nadeklara naba nga city roads ang maong mga dalan.

Malaumon si Konsehal Abaday nga pinaagi sa pagduso sa maong report ngadto sa komite sa public utilities ubos ni Konsehal Eric Salcedo, mahatagan sa aksyon ang maong hitabo. (MLR/SP)