Abaday pabor imbestigahan giingong wala makolektang renta sa kamerkaduhan

SUPORTADO ni Konsehal Roger Abaday, chairman sa komite sa senior citizens, ang taho ni Konsehal Jose Pepe Abbu Jr, atol sa sesyon sa konseho niadtong Martes nga gidumala ni Presiding Officer Protempore Konsehal Romeo Calizo, mahitungod sa obserbasyon sa Commission on Audit (COA) sa giingong wala makolekta nga stall rentals sa kamerkaduhan.

Matud ni Abaday nga dili kini ordinaryo nga isyu tungod kay naglambigit kini sa dakong kantidad nga angayan unta mapahimuslan ug makahatag sa mga batakang serbisyo sa katawhan sulod sa milabayng 12 ka tuig.

Gikahingawa ni Abaday ang pamahayag sa Commission on Audit (COA) human kini gidapit sa panagtigom sa komite sa pamalaod nga gidumala ni konsehal Edgar Cabanlas niadtong milabayng semana nga walay paningkamot ang nagdumala sa City Economic Enterprises Department (CEED) nga kolektahon ang mga delingkwente nga renta hinungdan nga natingob ug miburot ang maong kantidad.

Niini, gisugyot ni Abaday nga kinahanglan masuta pag-ayo ang insaktong kahimtang sa pagdumala sa panudlanan sa kamerkadohan atol sa himoong imbestigasyon. (MLRapanot/SP/photo by JBDacer)