Abaday nangusog pag-instalar og CCTV sa tanang barangay

PURSIGIDO si  Konsehal Roger Abaday, chairman sa komite sa public safety sa konseho, nga  mataoran gayod sa CCTV ang tanang barangay ning syudad alang sa pagmentinar sa kahusay ug kalinaw ug mas dali nga kasulbararan sa mga krimen.

Sa tigom sa komite sa public safety sa milabayng Huwebes, gipasabot sa konsehal  mahinungdanon kaayo CCTV ordinance tungod kay dako kaayo kini og ikatabang nga mapugngan ang krimen ingon man mapalapdan ang kampanya sa kahusay ug kalinaw.

Hinoon ang representante sa Office of the Building Official (OBO) mibutyag nga sa ilang bahin ila na gayod gi-require ang tanang  establisamento nga galokat sa building permit pag-instalar sa CCTV, ma-pribado man o publikong gambalay.

Sa iyang bahin, si Acting City Police Director Dexter Paje mibutyag nga  pabor siya sa maong balaodnon gumikan kay dako kini nga tabang  diha sa mga imbestigasyon labina sa back tracking ug alang sa daling pagtumbok sa mga suspetsado.

Sumala ni Abaday  aduna nay mga barangay nga naka-instalar og CCTV apan ang problema niini mao ang maintenance ug monitoring hinungdan nga kinahanglan mapalabang gayod ang ordinansa sa labing dali nga panahon.

Niini, giduso ni Konsehal Abaday ang maong  sugyot balaodnon ngadto sa City Legal Office alang sa ilang opinyon. (JRG/SP/Photos by Councilor Abaday FB page)