Abaday nangusog mamugna ang Legislative Backstopping Committee

GIHINGUSGAN ni Konsehal Roger Abaday, chairman sa komite sa public order and safety, nga mamugna ang legislative backstopping committee (LBC) sa katuyoan nga mapadali ang mga legislative measures nga gustong ipatuman aron hingpit nga mahimong balaod.

Kini ang unod sa special report ni Abaday atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Abaday, daghan nang legislative measures nga giduso sa mga konsehal apan naka-pending pa gihapon sa opisina sa City Legal ug wala ma-aksyoni tungod sa kakulangon sa mga abogado.

Siya midugang nga angayan nang mag-mugna og kaugalingon nga buhatan ang konseho nga magtutok sa maong trabaho aron mapadali ug mapatuman ang giduso nga mga balaodnon diha sa konseho.

Niini gisugyot ni Abaday ang pagmugna sa maong Legislative Backstopping Committee. (MLR/SP)