Abaday nanawagan og dayalogo aron masulbad ang panaglalis sa COWD, LWUA

GISUPORTAHAN ni Konsehal Roger G. Abaday ang resolusyon nga nag-awhag sa Regional Trial Court-Branch 41 nga paspason ang desisyon sa kaso tali sa Local Water Utilities Administration ug Cagayan de Oro Water District.

Gawas niini, gisugyot usab ni Abaday ang usa ka mas direktang pamaagi diin ang Konseho sa Dakbayan mismo mopatawag sa usa ka pormal nga panagpulong uban sa COWD ug LWUA aron personal nga madungog ang ilang mga baroganan ug mapangitaan sa hustong solusyon.

Gikasubo ni Abaday nga ang interbensyon sa LWUA sa milabayng usa ka tuig nakapasamot sa problema imbis nga masulbad kini, hinungdan sa kakulian sa pinansyal nga kahimtang sa COWD ug sa ilang serbisyo sa tubig.

Gikwestyon usab niya ang interim board nga wala makahatag og klarong kalamboan sa serbisyo sa tubig sa syudad.

Gihisgutan usab sa konsehal ang nagkalahi nga pamahayag sa regular ug interim board. Sumala niya, adunay legal nga dokumento ang regular board nga nagpamatood sa ilang katungod, samtang ang interim board nag-ingon usab nga adunay mga papeles sa ilang extension apan wala magpakita og klarong basehan.

"Kung pangutan-on nimo ang side sa regular board, naa sila’y legal documents. Moingon sad tong interim nga naa sila’y papeles," matod sa Konsehal.

Tungod sa kadakong epekto niini sa katawhan, gipasabot ni Konsehal Abaday nga samtang nag-koordinar ang Konseho sa mas taas nga opisyal sa LWUA, kinahanglan usab nga adunay lihok sa lokal nga lebel aron masiguro nga dili maapektuhan ang supply ug serbisyo sa tubig.

"Pangutan-on nato sila unsay ilang buhaton aron dili masakripisyo ang supply ug serbisyo sa panubig," pamahayag ni Abaday. (JAOclarit/SP)