Abaday nagpasida-an sa mga scammers


Hugot nga nagpasidaan si Konsehal Roger Abaday sa mga scammers ug mga establisamento nga unta hunongon na ang mga hiwing binuhatan tungod kay aprobado na ang balaod nga magpahamtang kanila sa tukmang silot.

Kini ang unod sa special report ni Abaday atol sa sesyon niadtong Lunes nga gidumala ni Presiding Officer Protempore Konsehal Edgar Cabanlas agig panawagan sa katawhan nga magbinantayon kanunay batok sa mga scammer human siya mismo ang nabiktima sa duha ka higayon.

Sumala ni Abaday nga nahibulong ug natingala ang iyang mga sakop sa opisina nga adunay delivery sa lechon nga miabot sa iyang opisina taliwala nga walay nag-order ug nasuta nga nabiktima kini sa pagpangilad.

Niadtong Oktubre 20 ning tuig sa ikaduhang higayon nabiktima na usab si Abaday diin miabot ang delivery sa iyang opisina nga mga pagkaon ug ilimnon bisan wala kini nila gi-order.

Nunot niini, nanawagan si Abaday sa katawhan nga dili angayang magkumpyansa ilabina diha sa social media aron dili daling mabiktima sa bisan unsang matang sa pagpangilad ug nagpasida-an sa mga mangingilad nga hunongon na nila ang ilang pagpamerhuwisyo sa katawhan.