Abaday nagpahimangno sa katawhan nga magbantay sa scammer

NANAWAGAN si Konsehal Roger Abaday, chairman sa komite sa senior citizens, sa mga negosyante ug on-line sellers sa dakbayan nga magmabinantayon sa mga ga-order pina-agi sa text o tawag ug siguraduhon nga kini lihitimo ug adunay insaktong impormasyon.

Kini human usa ka negosyante sa baboy ang nailad o na scam human giingong adunay nagtawag o nagtext kaniya nga naggamit sa pangalan ni Konsehal Abaday nga nag-order ug magpadeliver og lechon baboy diha mismo sa City Hall.

Sumala ni Abaday nga nakurat nalang ang iyang mga staff ug siya mismo sa maong delivery kay wala man kini mag-order.

Dugang pa ni Konsehal Abaday nga ang celpon number nga gigamit sa scammer dili iyahang numero ug tungod niini iyang gipahimangnoan ang katawhan ug mga negosyante labina sa mga on-line sellers nga magmatngon kanunay ug sigurohon ang ilang mga ka transaksyon lihitimo aron malikay nga mabiktima sa susamang pagpangilad.