Abaday naglaom masulbad ning tuiga problema sa traffic light

GILAUMANG masolbad sulod ning tuiga ang wala ga-function nga CCTV cameras ug traffic lights sa syudad.

Kini ang gibutyag ni Konsehal Roger Abaday, chairman sa komite sa public order and safety, atol sa tigom sa komite sa public utilities nga gidumala ni Konsehal Eric Salcedo.

Sumala ni Abaday nga sa dugay nga panahon napasagdan ug wala mapusli ang CCTV ug traffic lights tungod kay walay insaktong nag-mintinar nga maoy hinungdan sa pagkadaot niini.

Siya midugang nga dugay nang nabayaran sa goberno local ang contractor sa maong CCTV ug traffic lights apan gikahingawa sa opisina sa Roads and Traffic Administration (RTA), City Disaster Risk Reduction and Management Department (CDRRMD), ug City Engineering Office og kinsa ang mag-mintinar sa maong kabtangan.

Niini gitahasan sa komite ang nasangpit nga mga buhatan nga tun-an nila ang maong problema ug iduso ngadto ni Mayor Rolando Uy ang ilang rekomendasyon aron mapuslan ang maong CCTV ug traffic lights kay makatabang kini sa problema sa kapiot sa trapik sa Dakbayan. (MLR/SP)