Abaday nabalaka sa sunod sunod nga krimen sa syudad

DAKO ang kahingawa ni Konsehal Roger Abaday, chairman sa komite sa senior citizens, sa sunod sunod nga mga panghitabo sa krimen dinhi sa syudad ning bulan sa Hulyo nga naka-apekto sa kahusay ug kalinaw.

Kini ang unod sa special report ni Abaday sa sesyon sa konseho niadtong Lunes nga gidumala ni Bise Mayor Bebot Rodriguez.

Matud ni Abaday nga ang unang panghitabo mao ang pagluthang patay ni Federico “Ding” Gempesaw; ang hostage taking nga miresulta sa pagluthang sa duha ka mga police; ang robbery hold-up sa Zayas, barangay Carmen; ang hold-up ug pagpanlugos dinha sa barangay Lapasan ug ning ulahi ang nahitabong pagpamusil diha sa Corrales Avenue.

Matod niya nga ang mga hinungdan sa panghitabo subay sa namatikdan sa mga kritiko mao ang kahuyang ug kakulangon sa pagpatuman sa mga lakang nga makapakgang sa kriminalidad sama sa police visibility ug intelligence gathering.

Dugang pa, gitumbok usab ang disfunction sa kapolisan, kakulangon sa training ug kakulangon sa mga bag-ong teknolohiya.

Nunot niini, iyang gisugyot ngadto sa konseho ug sa kwerpo sa kapolisan sa katuyuan nga maseguro ang kahusay ug kalinaw sa dakbayan mao ang pag-improbar sa mga stratehiya sa surveillance ug pagpatrolya, pagpalapad ug pagpanumbalik sa force multipliers, pag-update sa crime mapping, pagpalit sa drone camera ingon man mga advanced technology nga gigamit na usab sa ubang mga dagkong syudad sa nasud.

Nagtoo si Abaday nga kun mahimo ug mapatuman kini nga mga rekomendasyon hayan makunhoran ug mapakgang ang mga krimen nga gakahitabo sa dakbayan.

Ang taho ni Abaday giduso ni Bise Mayor Bebot Rodriguez ngadto sa komite sa public order and safety ni Konsehal Romeo Calizo alang sa dugang pagtuon ug rekomendasyon. (SP/MLRapanot)