Abaday misugyot tun-an legalidad pag-operate sa bao-bao

KINAHANGLANG tun-an pag-ayo ang mga pamaagi aron mahimong legal ang pagpamasahero sa mga bao-bao nga nagdagan sa kadalanan sa syudad.

Kini ang panahom ni Konsehal Roger Abaday atol sa milabayng tigom sa komite sa public utilities, energy and transportation ni Konsehal Romeo Calizo human gituki ang hangyo sa mga operators ug drivers og bao-bao nga mahatagan sa panugot nga makapamasahero.

Matod sa konsehal nga iyang nasabtan ang panginahanglan ug katuyuan apan iyang gikabalaka nga basin moabot ang panahon nga ma-aksidente kini ug makompromiso na hinuon ang mga pasahero.

Dili nato ipugos nga ang illegal nga operasyon mahimong legal kun dili pangitaan sa pamaagi ug alibyo, sumpay ni Abaday.

Malaumon ang konsehal nga nasabot sa mga bao-bao operators ug drivers ang ilang katuyuan nga mosubay lang sa balaod kay ang gilantaw mao man ang seguridad sa katawhan.

Niini, si Abaday mipasalig nga kun aduna nay igong legal nga basehan nga mahimong lehitimo ang operasyon sa mga bao-bao andam siyang motabang ug morekomendar sa paghatag sa panugot.