Abaday misugyot sa pag-upgrade sa mga gamit sa RTA

HUGTANONG gisugyot ni Konsehal Roger Abaday, chairman sa komite sa public order and safety, sa pag-upgrade sa mga gamit sa Roads and Traffic Administration (RTA) aron maminusan ang gakahitabong aksidente sa kadalanan.

Kini ang unod sa special report ni Abaday atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Abaday nga angayan makabaton og breath analyzer ang RTA aron daling masuta sa mga RTA enforcer kun naka-inom ba sa ilimnong makahubog o bino ang mga driver nga nagmaneho sa mga sakyanan.

Laing gisugyot ni Abaday ang pagbaton og mga speedgun ug uban pang gamit.

Malaumon si Konsehal Roger Abaday nga pinaagi sa strikto ug hugot nga pagpatuman sa balaod sa trapiko makunhoran ang mga disgrasya diha sa kadalanan.

Ang maong report ni Abaday giduso ni Bise Mayor Bebot Rodriguez ngadto sa komite sa public utilities ubos ni Konsehal Eric Salcedo alang sa dugang pagtuon ug rekomendasyon. (MLR/SP)