Abaday misugyot palapdan seguridad sa mga tunghaan

GISUGYOT ni konsehal Roger Abaday, chairman sa komite sa public order and safety, nga palapdan pa ang seguridad sa mga tulonghaan sa syudad aron malikayan ang susamang panghitabo nga pagpamusil sa usa sa mga pang-publikong tunghaan didto sa Tacloban City nga mikalas sa kinabuhi.

Kini ang unod sa special report ni Abaday agig pagpaluyo usab sa susamang tinguha ni konsehal Jhon Jhon Rodriguez atol sa sesyon niadtong Lunes nga gidumala ni Bise Mayor Bebot Rodriguez.

Tinguha ni Abaday ang pagpatuman sa hugot nga seguridad pinaagi sa regular nga pag-patrolya sa kapolisan, pagbutang og Police Desk sa mga tunghaan, estrikto ug pag-improbar sa physical security pinaagi sa No ID, No Entry policy, pagbutang og mga CCTV camera palibot sa tunghaan, pagpahigayon og regular nga pagbansaybansay ug ang hugot nga koordinasyon ug kooperasyon sa kabarangayan, goberno local, mga ginikanan ug uban pang buhatan.

Nagtuo si Abaday nga pinaagi niini mahatagan og igong seguridad ang kabataan ug mapakgang ang mga daotang elemento nga adunay planong mohimo og krimen.

Ang maong taho ni Konsehal Roger Abaday giduso ni Bise Mayor Bebot Rodriguez ngadto sa komite sa edukasyon ni Konsehal Moreno Daba, komite sa public order and safety ni Konsehal Roger Abaday ug sa komite sa social services ni Konsehal Jonjon Rodriguez alang sa dugang konsiderasyon. (MLR/SP)