₱4.5-M 2027 budget sa Barangay 36 gi-aprobahan sa konseho
GIAPROBAHAN sa Konseho sa Dakbayan ang Resolution No. 2026-434, nga nagdeklarar nga epektibo na sa gitakdang petsa ang Ordinance No. 01-2026 sa Barangay Council sa Barangay 36, atol sa ilang sesyon kagahapon nga gidumala ni Bise Mayor Jocelyn “Bebot” Rodriguez.
Ang maong ordinansa naglangkob sa Annual Budget sa Barangay 36 alang sa tuig 2027, nga adunay gibana-banang kinitaan ug galastohon nga mokabat sa ₱4,557,398.00.
Ubos sa maong budget, gihatagan og prayoridad sa barangay ang mosunod nga mga proyekto alang sa kaayohan sa ilang mga lumulupyo: paglimpyo ug pag-declog sa mga kanal, ₱400,000.00, pagtaod sa street lighting system, ₱100,000.00, rehabilitasyon ug pagpa-anindot sa multi-purpose hall, ₱151,701.00.
Gawas sa maong mga proyekto, aduna pay ubang mga programa ug batakang serbisyo nga gigahinan sa barangay nga gilantawng magdalag dugang kalamboan sa ilang dapit.
Ang resolusyon nga gipalabang sa konseho alang sa maong katuyoan gipaluyohan sa komite sa barangay affairs nga gipangulohan ni Konsehal Marlo Tabac, ug sa komite sa pamalaod ug reglamento ubos ni Konsehal Edgar Cabanlas. (JRG/SP)







Comments