Abaday misugyot pagmugnag TWG batok kawat sa kable

GILARAW  sa komite sa public utilities  sa konseho ubos ni Konsehal Roger Abaday ang pagmugna og Techinical Working Group (TWG)  nga tahasan pagtutok sa pagsumpo sa  kaso bahin sa pagpangawat sa kable sa kuryente  sa Cagayan de Oro Power and Light  Company (CEPALCO).

Sa tigom sa  komite  kagahapon,  gitaho  sa  konsehal ang padayong kaso sa pagpangawat sa kable sa kuryente  nga dako kaayog  epekto sa katawhan.

Gikonpirma sa CEPALCO ang sagunson nga kaso sa kawat sugod bulan sa Oktubre ngadto sa  Disyembre 2025 ug bisan ning bulan sa Enero 2026, gibana banang  moabot na sa 3 ka kilometro ang katas-an  sa wire nga  gipangkawat.

Sa ilang bahin, ang Cagayan de Oro City Police Office (COCPO) mibutyag nga ila na kining giaksyonan sa miaging bulan pinaagi sa  magmobilize sa ilang  intelligence operatives apan nahunong  kini kay nabalhin ilang pagtutok ngadto sa kasaulogan sa pasko.

Hinuon gipasalig  sa COCPO nga ila kining pagatutukan karon ug hatagan sa igong pagtagad.

Si Konsehal Abaday  mibutyag nga mahinungdanon kaayo ang  pagmugna sa taskforce  aron matutukan gayod kining nagkagrabe nga kaso sa kawat sa kable sa kuryente  dinhi sa syudad. (JRG/SP)