Abaday misugyot nga mosagop sa bag-ong teknolohiya pagsulbad sa problema sa traffic

ANGAYAN nang mosagop ang Dakbayan sa bag-ong teknolohiya aron mapagaan ug matubag ang nasinateng problema sa trapiko.

Kini ang pamahayag ni konsehal Roger Abaday,chairman sa komite sa public order and safety agig reaksyon sa special report ni Konsehal Jonjon Rodriguez atol sa sesyon niadtong Lunes nga gidumala ni Bise Mayor Bebot Rodriguez sa isyu sa problema sa trapiko sa syudad.

Sumala ni Abaday nga nagtinguha ang Dakbayan nga mahimong metropolitan city apan wala pa mahatagi ug igo nga pagtagad ang modernisasyon sa traffic lights ug uban pang imprastraktura sa kadalanan.

Gidugang sa konsehal nga daghan pa ang angay ipalambo sa kalsada ug kinahanlan usbon o tun-an pag-usab ang uban nga ordinansa tungod kay adunay pipila niini nga dili angay gamiton sa kasamtangang panahon.

Nunot niini, malaumon si Konsehal  Abaday nga pinaagi sa paggamit ug pagpatuman sa mga bag-ong teknolohiya masulbad ang nagpadayong giatubang nga problema sa trapiko sa syudad. (MLR/SP)