Abaday misugyot nga amendahan ang curfew hour sa Dakbayan

HUGTANONG gisugyot ni Konsehal Roger Abaday, chairman sa komite sa public order and safety, nga amendahan ang implementasyon sa curfew hours sa syudad sa katuyoan nga maminusan ang naglatagaw nga kabatan-onan panahon sa tungang gabii ug mapakgang ang mga kriminalidad sa dakbayan.

Kini ang unod sa special report ni Konsehal Roger Abaday atol sa sesyon niadtong lunes nga gidumala ni Bise Mayor Bebot Rodriguez.

Sumala ni Abaday nga sagad sa mga krimen nga gakahitabo sa palibot nalambigit ang pipila ka minor de edad tungod kay wala ipatuman sa hingpit diha sa kabarangayan ang ordinansa sa curfew hour.

Tungod niini, anaa pa gihapon sa kadalanan taliwala sa lawom nga kagabhion ang kabatan-onan.

Gilaraw ni Abaday nga sugod sa alas-10:00 sa gabii hangtud sa alas-4:00 sa kadlawon, bawal maglatagaw ang mga minor de edad nagpangidaron 18 anyos paubos gawas kon adunay sugo sa panginahanglan sama sa pagpalit sa tambal o adunay kuyog nga ginikanan.

Ang maong sugyot ni konsehal Roger Abaday giduso ni Bise Mayor Bebot Rodriguez ngadto sa komite sa barangay affairs ni Konsehal Marlou Tabac ug sa komite sa public order and safety alang tukmang aksyon ug rekomendasyon. (MLR/SP)