Abaday miklaro nga dugay nang giplano ang pagbutang og septage plant

GIKLARO  ni Konsehal Roger Abaday, Chairman sa Komite sa Environment, nga dugay nang giplano sa kagamhanang lokal ang pagtukod og septage plant subay sa kamandoan sa Department of Environment and Natural Resources.

Kini ang gipaambit nga reaksyon ni Abaday sa sesyon niadtong Lunes nga gidumala ni Bise Mayor Bebot Rodriguez diin gidapit nga bisita ang mga kadagkoan sa Department of Public Works and Highway ug nagpahibalo nga adunay ihatag nga subsidy ang maong buhatan alang sa maong proyekto.

Sumala ni Abaday nga adunay gimugna ang syudad nga Technical Working Group alang sa paghimo og feasibility study kabahin sa maong proyekto niadto pang tuig 2016 ug kinahanlan nga kini paga-usbon tungod kay lahi na ang presyo sa gikinahalang materyales kaniadto ug karon.

Niini malaumon ang konsehal nga mahan-ay ug mapatuman kini nga tinguha kay dako kini og makatabang sa sanitasyon ingon man sa dugang kinitaan sa dakbayan.