Abaday mihangyo sa kapolisan nga tutukan ang mga kaso sa pagpangawat sa syudad

GIHANGYO ug nanawagan si Konsehal Roger Abaday, chairman sa komite sa games and amusement, nga kinahanglan tutukan ug hatagan sa aksyon sa kapolisan ang hinungdan sa paspas ug sunod-sunod nga mga insidente sa pagpangawat sa syudad.

Kini ang unod sa special report ni Abaday atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Abaday nga adunay mga reklamo nga iyang nadawat bahin sa maong insidente ilabi na ang anaa nanimuyo sa mga subdivision sa unang distrito.

Gani, matod niya, siya mismo ang nabiktima diin gi-ransack ang sakyanan nga gigamit sa iyang pang-rekorida.

Gihangyo usab ni Konsehal Abaday ang mga opisyal sa barangay nga palapdan ang pagpatrolya sa ilang mga tanod ug konsiderahon ang pag-instalar og dugang mga CCTV cameras aron mas mapalig-on ang seguridad sa matag barangay.

Ang maong taho giduso ni Bise Mayor Bebot Rodriguez ngadto sa komite sa public order and safety ni Konsehal Romeo Calizo alang sa aksyon ug rekomendasyon. (MLRapanot/SP)