Abaday midayeg sa PDEA-10, COCPO, RDEU-10

GIDAYEG ni Konsehal Roger Abaday, chairman sa komite sa public order and safety, ang local nga buhatan sa Philippine Drug Enforcement Agency (PDEA-10), COCPO ug Regional Drug Enforcement Unit RDEU-10 tungod sa ilang malampusong operasyon kontra illegal nga droga sa syudad.

Sumala ni Abaday nga duha ka operasyon sa PDEA-10 ang miresulta sa pagkasikop sa duha ka suspek kinsa nakuhaan sa kinatibuk-ang kantidad nga kapin sa P20 milyones nga balor sa shabu.

Si Abaday miingon nga ang hiniusa nga operasyon niadtong Oktubre 22 ning tuig sa PDEA Misamis Oriental Provincial Office sa usa ka mall sa syudad miresulta usab sa pagkasakmit sa usa ka kilo nga shabu nga nagkantidad og P1 milyon uban sa mga gamit sa droga ug usa ka sakyanan nga gigamit sa pagdala sa shabu.

Samtang sa laing operasyon sa PDEA nga gipangulohan ni Intelligence Officer Expidito Cardona inabagan sa intelligence office sa Cagayan de Oro City Police Office (COCPO) nga gipangulohan ni Maj. Dennis Flores, RDEU-10 ni Maj. Javee Babaan, ang miresulta sa pagkasikop sa duha ka mga suspek ug pagkasakmit sa 17 ka kilo nga shabu nga adunay street value nga P22 milyones diha sa barangay Kauswagan ning syudad.

Malaumon si Konsehal Roger Abaday nga magpadayon ang kapolisan sa ilang kampanya batok ilegal nga droga sa dakbayan.

Nunot niini giduso ni Abaday sa konseho ang resolusyon nga magpasidungog sa maong mga ahensya tungod sa ilang mga kalamposan. (MLR/SP)