Abaday miaghat pasakaa’g kaso mga nalambigit sa isyu sa ayuda

Giaghat ni Konsehal Roger Abaday, chairman sa komite sa senior citizens, nga ipadayon ni Konsehal James Judith II ang iyang pakigbisog dinha sa pag-imbistigar ug pagpasaka og kaso sa giingong mga nalambigit sa isyu sa ayuda aron mogawas ang kamatuoran.

Kini ang unod sa iyang special report atol sa sesyon sa konseho niadtong Lunes nga gudumala ni Bise Mayor Jocelyn “Bebot” Rodriguez.

Akong gidayeg ug gipasalamatan si Konsehal Judith sa pagtutok sa maong isyu human gimugna ang adhoc committee nga magpahigayon og imbestigasyon in aid of legislation sa nahitabong pag-apod apod sa ayuda atol sa ECQ sa kasagsagan sa Covid-19.

Apan dako ang iyang kahingawa sa resulta sa maong imbestigasyon tungod kay dili kumpleto ug wala matuhop ug matumbok pag-ayo ang mga adunay kalambigitan ug responsable sa isyu. Gani, dismayado ako sa sugyot ni Judith nga ang mga biktima maoy magpasaka og kaso nga wala may kapas kay mga kabus man og maglisod man gani bisan sa pamelete, sumpay ni Konsehal Abaday.

Ang taho ni Abaday giduso ni Bise Mayor Bebot Rodriguez ngadto sa komite sa social services ni Konsehal Girlie Balaba alang sa pagtuon ug rekomendasyon.