Abaday gustong makisayod sa bag-on gipatumang protocol sa local IATF

Si Konsehal Roger Abaday, chairman sa komite sa Senior Citizens, gustong masayod sa kasamtangang kahimtang sa pagpatuman sa ordinansa sa Higala App lakip na ang mga gipatumang protocol sa local IATF.

Kini aron matino kun angayan pa kining ipatuman taliwala nga miubos na ang kaso sa Covid-19 ug gani, adunay mga dapit sa nasud nga optional na ang pagsuot sa facemask ug halos mibalik na sa normal ang kapasidad sa pagpasulod sa mga balay kalingawan sama sa malls, restaurants ug uban pa.

Sa sesyon sa konseho niadtong Lunes nga gidumala ni Bise Mayor Jocelyn “Bebot” Rodriguez, si Abaday mitaho sa iyang nadawat nga reklamo sa pipila ka mga ginikanan kalabot sa duha ka mga tunghaan dinhi sa syudad nga striktong nagpatuman sa QR code ug dili magpasulod sa mga tinun-an ug mga ginikanan kun walay ikapakita nga QR code.

Matod sa konsehal nga nakahatag og kalibog sa katawhan ang padayong pagpatuman sa QR code hinungdan nga angayang hatagan kini sa igong pagtagad aron mapahibalo sa tanan ang gisunod nga mga gabayan sa local IATF ilabina nga nanumbalik na ang face to face classes.

Ang taho ni Abaday giduso ni Bise Mayor Rodriguez ngadto sa komite sa edukasyon ni Konsehal Suzette Daba ug komite sa panglawas ni Konsehal Maria Lourdes Gaane alang sa pagpahigayon og pagtuon ug rekomendasyon.