Abaday gisugyot pagbutang og CCTV sa kabarangayan

GISUGYOT ni Konsehal Roger Abaday, chairman sa komite sa public order and safety, nga butangan og CCTV camera ang tanang barangay sa syudad sa tumong nga daling maila ug daling masolosyonan ang gakahitabong krimen dinhi sa dakbayan.

Kini ang unod sa special report ni Konsehal Abaday atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Abaday nga base sa datus sa Cagayan de City Police Office (COCPO), misaka ngadto sa 17.3% ang gakahitabong  krimen tungod sa kakulangon sa ebedensya nga maoy basehan sa kapolisan aron masulbad ang maong panghitabo.

Siya midugang nga pinaagi sa pagbutang og CCTV sa kabarangayan, maminusan ang krimen ug daling mapangitaan sa solusyon ang mga panghitabo sa dakbayan.

Ang nasangpit nga sugyot ni Abaday giduso ni Bise Mayor Bebot Rodriguez ngadto sa komite sa public utilities ni Konsehal Eric Salcedo, komite sa barangay affairs ni Konsehal Marlou Tabac ug sa komite sa public order and safety ni Konsehal Abaday alang sa paghimo og makuting pagtuon. (MLR/SP)