Abaday gisugyot nga dapiton ang contractor sa basura sa dakbayan

ARON maas-asan ug masiguro ang kapasidad sa magdumala sa pagkolekta sa basura sa syudad, atong dapiton sa tigom sa komite sa environment ang kontraktor sa basura aron paminawon ang ilang mga plano.

Kini ang sugyot ni Konsehal Roger Abaday, chairman sa komite sa public order and safety, atol sa tigom sa komite diin gituki ang problema sa pagkolekta sa basura sa kabarangayan sa syudad.

Sumala ni Konsehal Roger Abaday nga kinahanglan kumpleto sa garbage trucks ug personahe ang kontraktor subay sa gisita nga gabayan ug lagda sa syudad aron masiguro nga makolekta sa insakto nga oras ug adlaw ang basura sa kabarangayan.

Nanawagan usab ang konsehal sa mga opisyal sa barangay nga motabang pagpasabot sa ilang katawhan pinaagi sa insaktong paglabay sa basura sa ilang dapit.

Niini malaumon si Konsehal Abaday nga mahatagan sa tukmang solusyon ang kasamtangan giatubang nga problema sa pagkolekta sa basura sa dakbayan. (MLR/SP/Photo from Bombo Radyo CDO)