Abaday gikahingawa ang mga fake news sa social media

GIKAHINGAWA ni Konsehal Roger Abaday, chairman sa komite sa games and amusement, ang mga fake news sa social media diin siya mismo ang nahimong biktima nga gikadismaya sa iyang kaparentihan ug sa iyang pamilya.

Sa iyang special report atol sa sesyon niadtong Lunes nga gidumala ni Bise Mayor Bebot Rodriguez, gibutyag ni Abaday nga nakurat nalang ang iyang pamilya ug kabanay sa taho nga mikalat ug migawas sa social media nga siya mipanaw sa laing kalibutan tungod sa gihambin niini nga balatian.

Ang konsehal mipadayag sa iyang pagkadismaya sa mga iresponsableng naghimo niini.

“Kalooy sa Dios wala koy sakit. I’m still alive and kicking,” sumpay ni Abaday.

Nakig-koordinar na si Abaday sa mga otoridad aron masuta kinsa ang naghimo niini aron manubag kini sa balaod kay daghan pa ang posibleng mahiagum sa  mga dili maayong binuhatan ginamit ang social media.

Nanghinaot si Konsehal Roger Abaday nga unta dili gamiton ang social media sa pagpagawas sa dili tinood nga impormasyon kun fake news kay kini makahatag ug kadaot sa katawhan ingon man sa katilingban. (MLRapanot/SP)