Abaday gikahingawa ang backlog sa koleksyon sa basura sa syudad

DAKO ang pagtoo ni Konsehal Roger Abaday, chairman sa komite sa public order and safety sa Konseho, nga ang kakulangon sa mga dumptrucks ug personahe maoy hinungdan nga dili makolekta ang mga basura diha sa kabaranggayan.

Kini ang gipaambit nga panahum ni Konsehal Roger Abaday atol sa tigom sa komite sa environment nga gidumala ni Konsehal Eric Salcedo, sukwahi sa pamahayag sa tigdumala sa Tencil nga nanobra ang ilang paghakot sa basura.

Sumala ni Abaday nga walay mahitabong backlog sa pagkolekta sa  basura kun gipatuman sa insakto ang schedule sa pagkolekta ug kumpleto sa mga sakyanan ug personahe ang Tencil.

Niini, malaumon si Konsehal Roger Abaday nga masunod sa Tencil ang ilang tahas subay sa gilagdaan niini nga kontrata tali sa dakbayan alang sa pagkolekta sa basura. (MLR/SP)